تبلیغات
حامیان ولایت - شعر تركی
سه شنبه 27 بهمن 1388

شعر تركی

   نوشته شده توسط: سهیل    نوع مطلب :اشعار تركی ،

کلیبر

 

mankaleybar

 

هاردا اولسام روحوم سنده دولانیر

باخیشیمدا ، گوزومده سن کلیبر

یازمایاندا سندن نیطقیم لال اولور

شعریمده سن ، سوزومده سن کلیبر

سن سیخیلسان بیل کی قلبیم سیخیلار

گوزلریم تار اولار ، دونیام ییخیلار

روحوم پرواز ائیلر جاندان چیخیلار

اوزگه ده یوخ ، اوزومده سن کلیبر

هر نفرین منه مینلر نفردیر

آدین منه گورکملی بیر ظفردیر          

سندن اوزاق دونیا منه زهردیر

نیشانیمدا ، ایزیمده سن کلیبر

او ماوی گوللریم ، گوللو باغلاریم

یاشیل مئشه لرین ، جاوان چاغلاریم

ساخلا امانتدیر اوجا داغلاریم

سن دره مده ، دوزوده سن کلیبر

حاققیم واردی سندن دئیم ، سویله یم

واللاه سن سیز بو حیاتی نئیله یم

چوخ شیرین سن ، جانیم قوربان ائیله یم

چورییمده ، دوزومداسان کلیبر

کیم سنین دونیادا قدرین بیلمه سه

شاد گونونده شاد اولوبان گولمه سه

غملی گونده گوز یاشینی سیلمه سه

گتیر یولا اوزونده ، سن کلیبر

من سندن یازاندا قلبیم شاد اولور

بال کیمی آغزیمدا عجب داد اولور

یئنه قلمیمده سندن یاد اولور

آتشیمده کؤزومده سن کلیبر

بؤیوک بابالاریم سنده یاتیبدیر                

شیرین جانین توپراغینا قاتیبدیر

بو عونوانلا هدفینه چاتیبدیر

قودرت اولوب دیزیمده سن کلیبر

مردلر اویلاغی سان ، مردلر یوردوسان

دییاریمدان شان شوهرتلی اوردوسان

بابک کیمی قهرمانلار یوردوسان

سکسن - دوخسان ، یوزومده سن کلیبر

تانری قودرت وئریب سندن دئییرم

اینان سنی جاندان عزیز سئویرم

صیاد دئییر هر مجلیسه گئدیرم

قورقود کیمی ، سازیمداسان کلیبر

نویسنده : صیاد جعفرزاده کلیبر